कोल्हापूर जिल्ह्याच्या पश्चिमेच्या डोंगररांगांतून कोकणात आणि देशावर वहाणाऱ्या अनेक नद्या उगम पावतात... कोकणात उतरणाऱ्या पश्चिमवाहिनी तर देशावर वहाणाऱ्या पूर्वप्रवाही...

एकाच डोंगर धारेवर बिलगून पडणारे पावसाचे थेंब एकमेकांचा निरोप घेतात आणि एक थेंब पोचतो सिंधु सागरात (अरबी समुद्र) तर दुसरा बंगालच्या उपसागरात विशाळगडाच्या घेऱ्यातल्या माचाळच्या साक्षीनं मुचकुंदीतला थेंब पूर्णगडाजवळ अरबी समुद्रात विलीन होतो तर त्याच नभातल्या जलाचा थेंब श्वासाच्या अंतरावर कासारी, पुढे शाळी कडवीतून पंचगंगेचा हात धरून कृष्णेच्या उदरातून बंगालच्या उपसागरात पोचतो... काजिर्ड्याच्या अंतरंगात वाघोठण उगम पावते आणि विजयदुर्गाच्या पहाऱ्यात सिंधु सागरात मिसळून जाते...

अशा विलक्षण भूगोलाच्या वेगळ्या अंतरंगाचा वेध आम्ही मैत्रेय अनेक दशके घेत आहोत... आडवाटेवरच्या या भटकंतीमध्ये कोल्हापूर पश्चिमेच्या अशा अठ्ठावीस लहान मोठ्या नद्यांचे उगम आणि प्रवाह आम्ही मैत्रेयानी अनुभवले आहेत. त्यातलाच एक प्रवाह पुन्हा साद घालतोय म्हणून निघालो आहोत त्याला भेटायला... त्याच आडवळणावर... कोरोनाच्या जागतिक संसर्गाचे सर्व आरोग्य नियम पाळून... रविवारी लवकर...

सह्याद्रि हा काही चारदोन शिखरांचा... एक दोन कड्यांचा नाही तर... अंसंख्य गिरीशिखरे... शेकडो घाटवाटा... आणि श्री शिवरायांच्या अभेद्य दुर्गांचा आहे.

या दृढ संकल्पनवर आम्ही मैत्रेय भटकतो... सह्याद्रि हा आमचा सखा... सोबती उभं आयुष्य फिरलो तरी तो संपणार नाही आणि संपूच नये . . . .

डॉ. अमर अडके

मैत्रेय प्रतिष्ठान